"Only You" (pocketbook paper)

“Only You”
Martha Cecilia

I. Sinopsis

Nang mapangasawa ng ina ni Erika ang ama ni Nico, naging malapit na ang binata sa mga ito. Lalong dumalas ang pagbisita at pangungumusta ni Nico sa mag-ina nang pumanaw ang ama ni Nico na napangasawa ng ina ni Erika. Ngunit kailanman ay hindi naging maganda ang pakikitungo ni Erika kay Nico. Hindi naging maganda ang naging impresyon ng dalaga sa binata kaya ganoon na lamang ang pagiging mailap niya dito, bukod pa sa pakiramdam niya ay masyadong nanghihimasok sa buhay nilang mag-ina si Nico.

Sa dalawang pumalyang relasyon ni Erika sa kanyang buhay pag-ibig, laging may kinalaman si Nico. Ang laging paliwanag ng binata ay nagmamalasakit lang naman daw ito dahil na rin sa katayuan ng pamumuhay ni Erika. Maganda at matalino si Erika, bukod pa sa mayaman ang pinanggalingang pamilya nito. Sa mga naging ka-relasyon niya, hindi nawawala ang elemento ng panloloko sa dalaga at si Nico ang laging nakakatuklas ng mga ka-anumalyahan ng mga lalaking iyon.

Nagpakasal si Nico at si Erika. Para kay Nico, dahil iyon sa pagmamahal niya kay Erika at pati na rin sa kapakanan ng negosyo ng kanilang pamilya. Kay Erika naman, gusto lamang niyang mapasaya ang kanyang ina na botong-boto kay Nico.

Sa lahat ng pagkakataon ay naging maunawain si Nico kay Erika sa kanilang malamig na pagsasama bilang mag-asawa. Alam niyang simula’t sapul ay hindi naman talaga pabor dito ang dalaga. Ngunit hindi ito naging dahilan para tumigil siya sa pag-asang balang araw ay matutunan rin siyang mahalin ni Erika.

Nang maaksidente si Nico, tila nabaliktad ang mga pangyayari. Ngayong mahal na mahal na ni Erika si Nico, paano na lamang niya maibabalik ang dating maganda, romantiko, at maunawaing pakikitungo sa kanya ng kanyang asawa? Talaga bang huli na ang lahat para mai-tama ni Erika ang lahat ng kanyang naging kasalanan kay Nico? Kaya pa ba siyang tanggapin ni Nico sa ngalan ng pagmamahal sa kabila nang lahat ng nagawa nito sa kanya?

II. Pagsusuri ng Estilo ng Akda

Ang akda ni Martha Cecilia na “Only You” ay isinulat sa pamamaraang moderno at radikal. Maaring dahil rin ito sa moderno at may pagka-liberal na setting at daloy ng kwento na maipapakita sa palitan ng dayalogo ng mga karakter. Makikita ang presensya ng mga salitang pormal, impormal at kolokyal sa nasabing akda.
Sa kategorya naman ng himig ng pagkakasulat, ipinakita ng may-akda ang iba’t ibang daloy ng pagsasalaysay. Kadalasan, makikita sa pag-uusap nila Erika at Nico ang pagragasa ng mga salita sapagkat karaniwan na ang tensyonadong diskusyong sa pagitan ng dalawang ito.
Sa mga bahagi ng akda na si Erika lamang ang ipino-pokus, ang himig ng paglalahad ay nagiging mabagal. Maaring dahil sa mga pagkakataong ito ay sinusubukang mailarawan ng maayos at malinaw sa akda si Erika, na naging epektibo naman.
Makikita ang payapang pagdaloy ng salaysay sa mga huling bahagi ng istorya, kung saan naganap ang karamihan sa mga realisasyon at sa pagmumuni ni Erika tungkol sa estado ng kanyang pag-ibig at relasyon kay Nico.
Sa ibang usaping diksyon katulad ng kahulugan ng mga salita, mapapansin na nangingibabaw ang paggamit sa konotasyon. Masasabing dahil ito sa moderno at radikal na daloy ng akda. Ang presensya ng mga tag-lish na salita ay makikita rin madalas sa istorya.
Parehong may pormal at impormal na paggamit ng wika ang akda. Ang impormal ng mga wika nito ay makikita sa halos buong parte ng kwento, habang ang pormal naman ay nasa piling bahagi katulad na ng paglalarawan sa mga pangunahing karakter at sa mga seryosong usapan sa pagitan ni Erika at ni Nico lalo na kung ang pinag-uusapan nila ay tungkol sa estado ng kanilang pagsasama bilang mag-asawa.
Hindi masyadong mapapansin ang mga tayutay na ginamit sa akda. Kung mayroon man ay maaring simile lamang. Maaring dahil ito sa pagiging mas impormal kaysa pormal na estilo ng storya, kaya ang presensya ng mga tayutay na alusyon o kahit hayperboli man lang ay hindi mararamdaman.
Ang mga salitang tiyak ay mapapansin sa mga paglalarawan sa mga karakter at sa ilang maiinit na eksena na mayroon sa akda. Katulad na lamang halimbawa ng, “Nanunuot sa kalamnan ni Nico ang tinig ng asawa. They are not even touching pero pakiramdam niya ay hinahaplos ng tinig nito ang buong pagkatao niya.”

III. Kongklusyon
Madali malaman ang estilo na ginamit ng awtor sa kanyang akda at hindi rin naman ganoon kahirap intindihin ang maaaring dahilan dito. Hindi gumamit ng masyadong pormal at malalalim na salita at estilo, kasama na ang iba’t ibang klase ng tayutay, ng pananalaysay ang may-akda sapagkat baka hindi maunawaan ng target nitong mambabasa ang kwento. Mapapansin na masyadong mababaw ang daloy ng kwento kaya masasabing karaniwang na tao ang pangunahing target na magbabasa ng akda, kung ikukumpara sa ibang mga klase ng literatura.
At base dito, nagtagumpay naman sa pag-balanse ng estilo ang awtor. Hindi nagkulang ang may-akda sa pagsasama-sama ng klase ng lenggwahe at kung paano niya ito ipinakita sa kanyang akda. Dahil maayos ang estilo na ginamit ng awtor, maganda ang kinalabasan ng akda – mula sa istruktura nito hanggang sa mismong laman ng bawat salitang binitawan nito.